До крај на месец април годинава треба да биде завршен делбениот биланс на МЈП Проаква. Очекувањата на првиот човек на претпријатието Томе Паскалоски, се дека со поделбата помеѓу Охрид и Струга, претпријатието ќе застане на свои нозе. Иницијативата за поделбата на „Проаква“ што стопанисува со водоводот и колекторскиот систем на Охридско Езеро, односно раздвојување на охридското и струшкото јавно претпријатие, се провлекува речиси една деценија.
„Моите очекувања се оптимистички . Јас секогаш сум отпимист и не застанувам со оваа постапка. Додека трае мојот мандат и додека сум во можност ќе притискам , бидејќи тоа е и интересот на градот. Ова е едно од поголемите јавни претпријатија. Претрпијатие со најголем век на постоење, со имиџ, достоинство, кое за жал го изгуби во последните 10 години“ – вели директорот.
Паскалоски кажа дека и услугите кон граѓаните се на високо ниво и не се случило и за најголем дефект да биде саниран што е можно побрзо, дури екипите работеле и текот на ноќта ако тоа било потребно. Но сепак смета дека треба да ги цениме ресурсите што ги имаме.
„Даваме квалитетна вода, што е реткост. Ако направиме споредба во светски рамки, околу милјарда луѓе немаат пристап до питка вода од целата човечка популација на земјата, ние сме една општина која треба да бидеме среќни и задоволни што живееме овде во Охрид покрај вакви ресурси, вакво убаво езеро и треба оваа фирма навистина да се респектира“ – додава Паскалоски.
Како што веќе ТВМ информираше, во тек е изготвувањето на делбениот биланс од страна на стручните служби кои работат на овој случај. Потоа извештајот треба да помине на Управен одбор, како и пред Советите на општина Охрид и Струга, па се изготвува нотарски акт а по согласноста на сите поголеми доверители ќе се разграничат побарувањата и обврските. Времето ќе покаже дали доколку дојде до поделба ќе има некакви последици бидејќи знаеме дека ова меѓуопштинско ЈП е формирано во 1999 година кога преку донации од германската влада и кредити од КФВ банка од Франкфурт инвестирани се над 20 милиони евра за водоснабдување на Охрид и Струга и за еколошка заштита на Охридско Езеро.
