Продолжува негативниот тренд на природниот прираст на населението во Охрид

Продолжува негативниот тренд на природниот прираст на населението во Охрид, покажуваат најновите податоци на Државен завод за статистика за првото тримесечје од 2026 година.

Во периодот јануари – март 2026 година во Охрид се родени 94 деца, додека починале 182 лица, меѓу кои и едно доенче. Со тоа, природниот прираст е негативен и изнесува -88, што значи дека бројот на починатите е речиси двојно поголем од бројот на новородените.

Во истиот период во Охрид се склучени 44 бракови, а регистрирани се и 20 разводи.

Негативниот демографски тренд е присутен и на национално ниво. Според податоците на Државниот завод за статистика, во првото тримесечје од 2026 година во државата се родени 3.380 деца, што е намалување за 4,1 проценти во споредба со истиот период лани.

Бројот на починати лица изнесува 5.342, што претставува намалување од 1 процент во однос на првото тримесечје од 2025 година. Од вкупниот број починати, девет се доенчиња.

На ниво на државата природниот прираст е негативен и изнесува -1.962, односно за толку бројот на починати лица е поголем од бројот на живородени деца.

Статистиката покажува дека негативен природен прираст е регистриран во дури 66 општини во државата.

Во првите три месеци од годинава се склучени 1.797 бракови, што е намалување за 2,7 проценти во споредба со истиот период минатата година. Во меѓувреме, бројот на разводи бележи раст – регистрирани се 494 разведени бракови, односно 6,2 проценти повеќе во однос на лани.