Долно Лакочереј, повторно мака-мачи со немањето вода. Овој пат, причината малку поинаква. Пумпите кои ја дистрибуираат водата до домаќинствата од ова охридско село, нешто повеќе од 4 дена, не функционираат. Проблемот се состои во тоа што Месната заедница не го подмирила долгот кон ЕВН, па ЕВН-Македонија, ја исклучиле струјата во водоснабдителниот објект, поради што пумпите останале надвор од функција. 
Единствен извор на оваа драгоцена течност им е селската чешма која се наоѓа во близина на црквата.
Стапивме во контакт и со претставници од месната заедница на Долно Лакочереј. Тие не информираа дека проблемот со неподмирените долгови донекаде е решен, бидејќи најголемите должници за потрошена вода веќе подмириле дел од својот долг кон месната заедница, и водните пумпи се ставени во функција.
Потврда добивме и од надлежните во ЕВН-Македонија. Портпаролот на оваа компанија, Атанас Ковачевски, не информираше дека веќе разговарале со претставниците од месната заедница и дека договориле одредена динамика на подмирување на долгот.
Околу прашањето дали има некакви отстапки доколку се работи за објект од витално значење, Ковачевски вели дека доколку тоа е единствениот начин на снабдување со вода, на корисникот му се пуштала електрична енергија во некој оптимален минимум со кој објектот и натаму би можел да функционира, барем во одреден дел од денот.
Од попладнево, жителите на Долно Лакочереј конечно добија вода, и тоа е добро. Но сеуште останува несфатливо како е можно во 21ви век, цели 5 дена, цело село да остане без вода за пиење.
{loadposition content9}
