Амбулантните возила на брза помош на охридските улици се соочуваат со игнорантски однос на возачите на моторни возила. Многу честа е појавата возачите да не реагираат и да не дадат предност на возилата иако имаат вклучена сирена, напоменува д-р Ана Неделкоска , раководител на Брза помош.
„Возачите ги замолувам , и сега и друг пат сме апелирале да внимаваат на улиците кога ќе ги слушнат сирените и ќе ги видат ротационите светла. Доколку има можност да направат простор да помине брзата помош. Сирена и ротација вклучуваме само во најитни случаи. Одиме и на други повици без сирена бидејќи се вознемируваме и ние и граѓаните“, предупредува Неделкоска.
Дополнително амбулантните возила имаат сериозен проблем со уште понесовесни возачи кои непрописно паркираат возила пред ургентниот центар, посочува д-р Неделкоска. Се судруваме со проблем и дење и ноќе со возачи кои несовесно паркираат . Во моменти кога минути одлучуваат за нечиј живот или смрт амбулантното возило е блокирано на паркингот. Поставени се сообраќајни знаци , но не се почитуваат. Апелира возачите да внимаваат како и каде се паркираат .
„Возачите не внимаваат како паркираат дали пристапот на возилата за влез и излез е загрозен или не. Често имаме проблем. Реагира и полицијата, а викаме и шлеп служба“, вели д-р Неделкоска.
Паркингот кој се наоѓа пред ургентниот центар е единствениот градски бесплатен простор. Дел од пркингот е на општината , а дел на приватни сопственици.
