Состојбата со водостојот на Охридското езеро сеуште е сериозна. Денес тој изнесува 27 см над дозволената максимална кота. Ваквите хидролошки проблеми траат веќе неколку недели, а се резултат на обилните врнежи, велат од ЦУК. 
Критични точки на охридското крајбрежје се населбите кои имаат мал заштитен појас и при мало влијание на јужниот ветар претрпуваат оштетувања. Тука спаѓаат населбата Канео, брегот од источниот дел од езерото, Радожда како и централниот дел на Струшката ривиера. Митко Темелковски, раководителот на регионалниот ЦУК вели дека се превземени сите мерки за намалување на нивото на езерото. Денес коритото на реката Сатеска се пренасочи во Црн Дрим и со тоа се растерети езерото.
Од ЦУК кажуваат дека слична ваква состојба со водостојот на езерото имало и во 2010 год. кога некои делови од охридското крајбрежје беа поплавени, но додаваат дека овојпат се поподготвени за ваквото ниво на езерото.
Темелковски вели дека состојбата со речните корита е задоволителна и дека сите се навремено исчистени и регулирани па поради тоа и не дошло до излевање на оние места кои во минатото биле критични како Орман, Сушица, Сатеска и др. Раководителот на регионалниот ЦУК кажа дека неопходно е конечно да се формира долгонајавуваната Агенција за управување со водите и водните биланси бидејќи треба забрзано и правно и практично да се регулира оваа проблематика и точно да се знае во кои услови како треба да се делува. Од ЦУК очекуваат состојбата со нивото на езерото пополека да се нормализира бидејќи до сабота не се предвидуваат пообилни врнежи од дожд.
{loadposition content9}
