Нова мисија пред планинските спасители
![спасители](/wp-content/themes/yootheme/cache/32/Sequence-01.00_20_12_19.Still005-32d2b888.jpeg?x28309)
Македонскиот Национален сојуз за планинско спасување доби признание за постигнатите резултати од Интернационалната комисија за алпинистичко спасување (ИКАР). ИКАР ги обединува сите спасителни служби од светот, а дел од нив е и националната спасителна служба. Македонските спасителите добија покана за трансформација на нивното членството од Б во А категорија после неколку години од приемот во ИКАР. Признанието доаѓа за постигнатите резултати на полето на спасување во изминатите 7-8 години, информира Антонио Додевски, од планинската спасителна служба од Охрид и делегат од националниот сојуз на 73от конгрес на ИКАР, во Швајцарија.
![](https://tvm.mk/wp-content/uploads/2022/10/Sequence-01.00_17_08_08.Still003-1024x576.jpg?x28309)
„За нас е признание затоа што е прогресирање во членството почнувајќи од Е категорија нагоре, а тоа не оди случајно. Оди по принцип на развој, на постигнати резултати од претходното ниво на активности и работата која ја спроведуваме. Најважно од се е, организацијата која е член со било која категорија дали ја покрива територијата на целата држава. Тоа е нашата интенција тука ќе имаме доста работа. Останатите организации да ги јакнат нивните капацитети во наредниот период што е можно повеќе“, напоменува Додевски.
![](https://tvm.mk/wp-content/uploads/2022/10/Sequence-01.00_19_31_10.Still004-1024x576.jpg?x28309)
Покрај тоа, македонските, планински спасители добија право на 4 гласа во Генералното Собрание на ИКАР, еднакво со најмоќните спасителни служби во светот, кажува Додевски. Пред нас претстои работа за да ги обединиме сите тимови од организациите, клубовите и службите кои работат спасување на планина кај нас. Објективно гледано, тие работат со недостаток на опрема, возила, а и едукацијата на спасителите не е на еднакво ниво.
![](https://tvm.mk/wp-content/uploads/2022/10/Sequence-01.00_17_01_16.Still002-1024x576.jpg?x28309)
„Целта на националниот сојуз е примена на целите на ИКАР, да се применат нивните стандарди на територија на нашата држава, да извршиме обуки, сертифицирање , да дефинираме стандарди за работа на службата , стандардни процедури и протоколи по кои ќе овозможиме еднаков третман на несреќите на планина на било која точка од државата. За жал, сега не е така , пред нас претстои многу работа за да се постигне ова“, вели Антонио Додевски.
Охридската планинска спасителна служба дејствува во регионот и оштините Охрид, Струга, Дебарца, Вевчани, Ресен и Поградец. Службата располага со современ оперативен и тренинг центар, две теренски возила и специјализирана опрема за изведување на сложени спасителни операции на планина. За СОС потребите на корисниците, се достапни 24 часа , 7 дена во неделата на дежурниот телефонски број 13-112 или преку андроид апликацијата за паметни телефони, која бесплатно може да се спушти од Play Store. За 10 месеци од оваа година имала 26 интервенции без сериозни политрауми, а лани интервенирала во 50 случаи од кои 14 биле со политрауми.