По повод Новогодишните и Божикни празници, денес на плоштадот пред Општина Вевчани беше организиран Новогодишен базар.
Директорката на детската градинка „Планински цвет“, Даниела Мурџеска го отвори настанот и им посака добредојде на присутните и истакна надеж дека овој настан ќе премине во традиција. Исто така изрази голема благодарност до Давид Николовски и неговата фамилија за донација на Новогодишните пакетчиња за дечињата.
Организацијата покрај вработените од детската градинка, ја потпомогнаа и родителите на дечињата згрижени во градинка. На базарот можеше да се купат секакви рачни новогодишни изработки и прекрасна и вкусна храна. Имаше одлична атмосфера, музика и настап на најмилите дечиња.
„На крајот, на големо задоволство на децата, како најголемо изненадување се појави ДЕДО МРАЗ, кој им раскажа приказни на дечињата и им подели пакетчиња и бомбончиња. Општина Вевчани им благодари за прекрасната организација и детските насмевки“, напиша градоначалникот Спасе Кочовски, на официјалниот фејсбук профил.
