Од нуркачкиот центар Акватек изведоа еколошка акција на иницијатива на ресторан и плажа Бонанца, а пред почетокот на летната сезона. Акцијата беше успешно реализирана, информира Никола Паскали од НЦ Акватек. Покрај Паскали во акцијата бил вклучен и нуркачот Климчо Ангелоски.
„Целта беше од еколошки и безбедносен карактер за капачите на плажата. Од водата на брегот на капалишетото беа извадени повеќе автомобилиски гуми, собрани беа две вреќи со пластични шишиња, чаши, лименки, стаклени шишиња, најлони и амбалажа од прехранбени предмети кои ги користат луѓето во секојдневниот живот“, кажува Паскали.
Паскали апелира до граѓаните да се еколошки одговорни, а за безбедност на посетителите повикува сопствениците на рестораните на плажите да покренат слични иницијативи за подводни чистења.
Никола Паскали, подводен археолог, познат е на јавноста по неговите еколошки активности со кои досега извел бројни подводни еко акции. Самостојно нуркајќи ги исчистил крајбрежните делови на Сараиште, Мостот на желбите, Потпеш.
