Охрид домаќин на меѓународниот фолклорен фестивал „Разиграно оро“. Неговото свечено отворање ќе биде утре, трети јуни од 20 часот, на сцената на Античкиот театар, а ќе трае до петок. Од оргазнизациониот одбор на фестивалот секретарот на фолклорното друштво „Филиграни“, Зоран Симјаноски, вели традицијата продолжува и од година во година фестивалот го зачувува приматот на најмасовна манифестација од тој вид во Македонија.
„Оваа година по седми пат го одржуваме меѓународниот фолклорен фестивал „Разиграно оро 2013“. Го одржуваме епитетот на најмасовен фестивал бидејќи оваа година негде бројката е околу 1500 учесници од 14 земји. На свеченото отварање од секоја земја ќе настапи по една група, а наредните денови 4 и 5 играњето ќе се одржи на плоштадот кај фонтаната односно Крушевска република“.
Некаде околу 70 % од учесниците се веќе пристигнати, а до крајот на денот се очекува да пристигнат и останатите, вели Симјаноски. Додаде дека организационо максимално се подготвени за одржување на фестивалот.
„Сместувањето на гостите е од хотел Амбасадор до хотел Десарет, скоро се сите хотели земени, тоа е се во наша организација така да гостите пријатно ќе се осеќаат во нашиот град и мислам дека сите задоволни ќе си заминат од нашиот град“.
Дефилето вообичаено ќе биде покрај езерскиот брег, па низ стариот дел на градот се до Антички театар. Годинава, нагласува Симјаноски, со особено внимание се очекува и традиционалниот семинар на кој ќе се дебатира на тема „Фолклорот на словенските народи“, со посебен акцент на фолклорните традиции на Полска и Словачка. Со цел за збогатување на програмската понуда, организаторот планира од наредната година на секое фестивалско издание да бидат презентирани културните богатства и особеностите на народните традиции и фолклорот на две од државите учеснички на оваа манифестација. Симјаноски ги покани сите охриѓани и гости доколку сакаат да видат нешто добро да присуствуваат на свеченото отварање на Античкиот театар.
{loadposition content9}
