На комеморацијата одржана во општиското средно стручно училиште Св Кирил и Методиј со едноминутно молчење му одадоа последна почит од школото каде што тој работеше и го даваше својот придонес за развојот на спортот во Охрид.
Во присуство на смејството на почитуваниот професор Влатко Димитров пригодно обраќање имаше директорката Славица Костоска. Таа потесети на неговите човечки и професионални квалитети. „Беше тивок, но енергичен човек. Неуморен, амбициозен, храбар и непоколеблив, полн со ентузијазам. Секогаш доследен на своето мото: „Во здраво тело, здрав дух“. Беше човек од кој секој може да учи. Беше професионалец со беспрекорна дисциплина и исполнителност. Од него можевме да научиме дека ако на работата ѝ се пријде со љубов, таа може да биде повеќе задоволство отколку товар. Загубивме човек и колега, џентлмен од стар ков, кој многу ќе ни недостасува, кажа Костоска.
„Да го испратиме во вечното почивалиште нашиот Влатче. Почитувано семејство, почитувани колеги, членови на неговото семејство, ученици секогаш дисциплинирани и негови следбеници, претставници од локалната власт горди на неговите успеси,колеги и спортски работници поддржувачи и оддавачи на признание на делото на професор Влатко Димитров“, истакна во своето обраќање Славица Костоска.
Костоска потсети и на неговиот несебичен и професионален придонес како тренер за развој на атлетиката и големите успеси постигнати во атлетскиот клуб Охрид. Наведе дел од бројните успеси на преку 1500 државни натпревари, соборени 120 македонски рекорди во сите категории, учество на преку 300 меѓународни натпревари од кои на 40 балкански натпревари, 20 европски и 5 светски првенства, учество на повеќе олимписки фестивали, учесник на Олимписки игри во Пекинг 2008, на Европските Олимписки Игри во Баку минатата година, а во 2015 година беше избран за најуспешен тренер.
Професор Влатко Димитров до вечното почивалиште беше испратен во14 часот на градските гробишта во Охрид.
