Со свечена приредба и спортски активности и игри во школскиот двор ООУ „Братство Единство го одбележа патрониот празник. Оваа година мотото под кое училиштето го прослави патронатот е „Да си подадеме рака“.
25-ти мај за нашето училиште е посебен ден. Овој ден е познат како Ден на младоста, братството и единството. Второто име за младоста се децата. Ние сме тука за нив, тие го исполнуваат нашето работно секојдневие, растат и созреваат пред нашите очи. Оваа година заедничкото мото под кое го славиме патронатот е „Да си подадеме рака“. Раката е симбол за поврзување, помирување, поздравување, подадената рака значи почит, соживот, пријателство подадената рака нуди помош. Затоа да не забораваме да си подадеме рака едни на други – истакна пред присутните на прославата директорот на училиштето, Џемал Мехмед.
На свеченоста беа доделени пофалници за континуиран успех на учениците од деветто одделение. Беа доделени награди и на најуспешните на литературниот и ликовниот конкурс, како и на ученците кои постигнааа значајни успеси на општински, регионални, државни и меѓународни натпревари.
Меѓу наградените ученици се Ахмед Сулајман за постигнато второ место на општински, второ место на регионален и трето место на државен натпревар по математика, Есер Миминоски за освоено трето место на општински натпревар по математика, Мерве Мехмед за постигнато трето место на регионалниот натпревар по физика и математика и трето место на меѓународен натпревар по турски јазик и книжевност, Корај Ахмед за освоено второ место на меѓународен натпревар по турски јазик и книжевност, Ајча Муфти за освоено прво место на регионалниот натпревар по географија и прво место на меѓународен натпревар по турски јазик и книжевност, Зејнеп Рамадан за освоено второ место на регионалниот натпревар по географија и Селма Ахмед за освоено второ место на општински натпревар по англиски јазик.
Училишниот хор е награден за освоено прво место на меѓународен хорски фестивал во Србија. Покрај учеството на училишните натпревари, училиштето е дел од низа проекти, организира работилници и разни едукативни настани за своите ученици.
Во училишниот двор на патронатот беа реализирани низа спортски и забавни содржини во кои беа вклучени ученици од оделенска и предметна настава. Во дворот се играше и шах во новото шаховско катче на отворено реализирано на иницијатива на ШК „Ласкер“ со поддршка на јавни претпријатија и спонзори. На свеченоста беа присутни претставници од локалната самоуправа, директори на основни и средни училишта од градот, наставници и родители.
