Со поддршка на Општина Охрид, преку Одделението за култура обезбедени се две изданија на Брајово писмо од книгата „Гоце Делчев“ на Ванчо Николески, кои ќе бидат предадени на Библиотеката „Григор Прличев“ и на Здружението на слепи лица од Охрид.
„По повод 4 Јануари-Meѓународниот ден на Брајовото писмо ја искажуваме нашата безрезервна поддршка за поголема инклузија на слепите лица и лицата со оштетен вид во сите сегменти на општественото живеење“, објави Кирил Пецаков – Градоначалник на Општина Охрид.
Брајовото писмо им овозможува на слепите лица да имаат пристап до информации и контакт со надворешниот свет, а издавањето на книги со брајова азбука, обезбедува поголем пристап и до образованието, литературата и културните вредности, додаде градоначалникот. Порача дека општината и во во иднина ќе продолжи да создава услови за поголема вклученост во заедницата на сите граѓани, бидејќи сите заслужуваме подеднакви права и можности.
Здружението на слепи лица и лица со оштетен вид во Охрид брои 75 членови. Претседателот, Славчо Џајковски вели дека со локалната самоуправа имаат одлична соработка и упати јавна благодарност за новите изданија на Брајово писмо.
Минатата година Општина Охрид подготви две изданија на Брајово писмо од Автобиографијата на Григор Прличев.
Брајовото писмо е точкасто релјефно писмо, односно тоа е тактилен систем за читање и пишување што го користат слепите лица низ целиот свет. Составено од Луј Брај, во 1872 година Во балканските земји писмото било воведено помеѓу 1900-тата и 1918-тата година, а во 1955-тата година УНЕСКО за прв пат го прогласува брајовото писмо како универзално писмо за слепи и слабовидни лица.
