Избрани основни јавни обвинители на повеќе обвинителства, Стојанчо Арнаудоски ќе раководи со ОЈО Охрид
На четириесет и осмата седница Советот на јавните обвинители на Република Северна Македонија го донесе новиот Деловник за работа на Советот на јавните обвинители и избра повеќе основни јавни обвинители и јавни обвинители во неколку обвинителства низ државата, а дел од нив и досега раководеле со обвинителствата.
-Советот донесе одлуки за избор на јавниот обвинител Стојанчо Арнаудоски за Основен јавен обвинител на ОЈО Охрид, за избор на јавниот обвинител Неат Црој за Основен јавен обвинител на ОЈО Дебар, за избор на јавниот обвинител Биљана Стевчева за Основен јавен обвинител на ОЈО Радовиш, за избор на јавниот обвинител Борче Јанев за Основен јавен обвинител на ОЈО Кочани, за избор на јавниот обвинител Ерол Шериф за јавен обвинител во ОЈО Ресен и за избор на јавниот обвинител Зоран Маркоски за јавен обвинител во ОЈО Скопје, се вели во соопштението од Јавното обвинителство.
Во нивното соопштение додаваат дека Советот не донесе одлуки за избор на Основен јавен обвинител на ОЈО Кичево, јавен обвинител во ОЈО Крива Паланка и јавен обвинител во ОЈО Кочани, од причина што не се пријавил кандидат/и со уредна документација.
Исто така, на денешниот Совет Претседателот на Советот предложи да се донесе одлука за распишување на нов оглас за избор на Основен јавен обвинител на ОЈО Кичево, од причина што на денешната седница не се изврши избор поради немање на кандидати, а со тоа се согласија и останатите членови на Советот.
