Со концептот „За убав град“ наша заложба е создавање квалитетни спортски кадри и спортисти, кои ќе го промовираат спортот и Охрид како спортски град , на прес конференција порача Кирил Пецаков координатор на советничка група на ВМРО-ДПМНЕ. Најави Младинско спортско лето – Спорт за младите, спорт за сите.
„ Целта ќе биде во летниот период анимирање и организација на повеќе спортски настани и презентација на различни спортови. Организација на меѓународен ракометен турнир за сениорски и младински категории. Возобновување на ракометниот турнир кој се организираше во Охрид со кој ќе се добие целосно нов туристички производ и можност за збогатување на туристичката понуда на градот и привлекување на повеќе туристи“, рече Пецаков.
Покрај ракометниот турнир, Пецаков најави и организација на меѓународен кошаркарски турнир за сениорски и младински категории, но и подем на останатите спортски дисциплини.
„ Преку афирмација на сите спортови, спортовите на вода, атлетиката, боречките спортови – Охрид да биде домаќин на европски и светски превенства во различни категории“, кажа Пецаков.
Кирил Пецаков координатор на советничка група на ВМРО-ДПМНЕ, најави и повторно формирање на Совет на млади и отворање Канцеларија за млади, изградба на станови за млади брачни парови и изградба на 30 рекреативни зони, односно 5 тениски терени, 5 мултифункционални игралишта, 20 детски игралишта.
