Пецаков: Затворениот базен во Охрид треба да биде готов за најмногу две години
По единаесет години,конечно ќе продолжи изградбата на затворениот базен во Охрид. Надминати се сите технички, финансиски и административни пречки. Владата усвои одлука за завршување на проектот, а за целосната реализација се обезбедени 470 милиони денари.
„За базенот поминавме процес од отприлика година и пол, зборувам и како локална, но и како централна власт, во кој што се решаваа доста недостатоци во самиот проект, најголемиот проблем беше во машинското одделение, да кажеме, или начинот на кој што ќе се снабдува објектот и со топла вода, но и потрошувачката на електрична енергија.”-изјави градоначалникот на Охрид Кирил Пецаков.
Еден од проблемите беше и долгогодишниот јаз меѓу условите под кои бил склучен првичниот договор и денешните цени на материјалите и услугите.
„Кога ќе се отвори тендерската документација, ќе го добиеме и крајниот рок, меѓутоа врз основа на лична перцепција и од тоа што можам да видам што е завршено до сега, не би требало да е повеќе од година и пол, максимум две.”-изјави Пецаков.
Со завршувањето на објектот, Охрид конечно ќе добие современ затворен базен за тренинзи и развој на водените спортови.
Новинар Соња Рилковска
