МВР има сознанија кој го извршил грабежот во полицискиот магацин во Охрид. Ова го истакна министерот за внатрешни работи Оливер Спасовски во интервјуто за Радио Слободна Европа.
Да, имаме сознанија и тие сознанија ги проверуваат и ги документираат колегите со цел да можеме да излеземе со кривична пријава – изјави Спасовски.
Спасовски повеќе се осврна на она што ја разбранува јавноста, а тоа е што точно беше украдено од магацинот. Од ВМРО-ДПМНЕ побараа одговорност од Спасовски со тврдење дека се случила кражба на оружје, муниција и бомби од депото на МВР во Охрид. Не е украдено оружје и такви шпекулации кои сакаат да се употребат за дневно политички цели, не ни користат на никој, потенцира министерот.
Значи ова е прирачен магацин од кој биле одземени предмети кои биле складирани таму и дел хемиски средства кои што ги користел СВР Охрид, такашто воопшто не станува збор за кражба на оружје, а се разбира дека сите истражни дејства се преземени насочени кон откривање на сторителите – вели Спасовски.
Портпаролот на СВР, Охрид Стефан Димоски на 16-ти април информираше дека од помошниот магацин за расходувана опрема на кој се наоѓа во Стара касарна биле украдени солзавци, шок бомби и други предмети кои биле предвидени за расходување.
На прашањето како граѓаните да имаат доверба во полицијата кога од нејзини магацини се краде, а полициски службеници примаат поткуп, министерот Спасовски во интервјуто вели дека тоа се случува и во други институции низ светот.
Значи да не создаваме погрешна перцепција во јавноста. Државниот апарат мора да биде ефикасен во борбата против коупцијата и против кривичните дела. Подеднакво да одговори без разлика за кој станува збор. Тие постапки да бидат транспарентни и да бидат неселективни. Секако дека мора да работиме да се стесни просторот на корупција и во редовите на институциите, а најважно од се е да имаме ефикасност во откривањето на случаите – кажа министерот.
Секако дека постојат низа мерки и механизми кои ги преземаат сите институции во рамки на антикорупциските активности, а кражби се случуваат секаде, престапници постојат насекаде, важно е државата да има одговор и оние кои направиле кривични дела да се изведат пред лицето на правдата, вели Спасовски.
