Бројни верници од цела Македонија денес се собраа во манастирот „Св.Спас“ во Горно Лакочереј за да го прослават вознесението христово-Спасовден. Манастирот од синоќа ги прима верниците и сите посетители почнувајќи со вечерната богослужба. Денес пак во манастирот се пееше утринска литургија со која чиноначалствуваше митрополитот Дебарско-кичевски, г.Тимотеј. Верниците кои ги затекнавме во манастирот ги запрашавме како тие го прославуваат денешниот голем празник.
„Палиме свеќи за здравје, за семејството. Убаво, како и секоја година. Да ни помогне на сите.“
„Ние не сме оттука. Доаѓаме секоја година, и навистина е убаво. Се реновираше манастирот.“
„Спасовден е голем свет празник за нас, нешто најубаво. А манастирот „Св.Спас“ е прекрасен.“-рекоа дел од нив.
Вознесението Христово или Спасовден е еден од најзначајните празници во христијанството, вели протоерејот Никола Христоски, секретар на Дебарско-кичевската епархија. Тој вели дека овој празник кој се празнува на четириесеттиот ден од воскресението Христово и кога Господ се вознесува на небесата има огромно значење за луѓето.
„Се разбира за и ние да земеме учество во тој празник и да седнеме од десната страна на Бога и Отецот и ние мора да земеме учество во сите оние животни перипетии кои што ги поминал нашиот спасител, односно секој од нас треба да го носи својот крст за да можеме и ние да се воскреснеме со нашиот спасител Господ Исус Христос и да седнеме од десната страна на Бога и Отецот. Токму затоа овој празник и меѓу луѓето се развил голем култ кон овој празник. Не случајно секое трето четврто село, не само во Охрид и околината туку и по другите градови и околни места е изградена барем по една црква или еден манастира кои се посветени на овој празник бидејќи многу често луѓето го земале и за своја слава знаејќи ја значајноста на овој празник.“-вели протоереј Никола Христоски-секретар на Дебарско-кичевска епархија.
Верниците имаат посебна традиција за денешниот празник која со години се практикува во манастирот „Св.Спас“.
„Народот излегува со иконите и со бајракот, и оди до гумното кај крстот, и оттаму потоа се враќаат повторно назад со иконите во црквата и после тоа се служи ручек за сите гости и посетители на манастиров. Тоа е традиција секоја година. Претходниот ден, пред Спасовден, имаме забава со културно-уметнички настан.“-рече Александар Крстев-црковен одбор на манастирот „Св.Спас“-Г.Лакочереј.
Верниците освен што палеа свеќи за здравје и среќа во манастирот, се напиваа и од осветената вода, а многу од нив за здравје на своите семејства донираа и храна, облека која подоцна луѓето од црковниот одбор ја продаваат, а со средствата се грижат за одржувањето на манастирот, кој особено во овој период и по изградбата на новите конаци е привлечно место и за странските туристи.
