Во тек преговори за поврзување на Охрид со Абу Даби или Шарџа

Охрид би можел да добие директна авионска линија со Обединетите Арапски Емирати од следната сезона на летање. Министерот за транспорт и заменик-претседател на Владата, Александар Николоски, во Собранието изјави дека се преговара за воспоставување директна линија меѓу Охрид и еден од аеродромите во ОАЕ.

Според Николоски, како можни дестинации се разгледуваат Абу Даби и Шарџа, а поврзувањето би имало значење пред сè за развојот на туризмот во Охрид и регионот.

„Сè уште е во дискусија, би рекол дека е многу извесно дека ќе ја договориме, тоа е директен лет помеѓу еден од аеродромите во Обединетите Арапски Емирати, дали ќе е Абу Даби, дали ќе е Шарџа, до Охрид, што многу ќе придонесе за развојот на туризмот“, изјави Николоски.

За Охрид, воспоставувањето директна линија со ОАЕ би значело отворање на нов пазар за туристи од регионот на Заливот и подобра воздушна поврзаност со една од најзначајните авио- и туристички точки на Блискиот Исток.

Во меѓувреме, потврдено е дека од март 2027 година ќе биде воспоставена директна авиолинија Дубаи – Скопје со авиокомпанијата Flydubai.