На 14 и 15 септември 2024 година, во Оперативниот центар на Планинската спасителна служба при Црвен крст Охрид, се одржа обука за едукатори на теми поврзани со биолошката разновидност и пештерските екосистеми во Националниот парк Галичица, како и со влијанието на климатските промени врз природата во Паркот. Оваа обука беше организирана во рамките на проектот „Заштита на пештерските екосистеми и загрозените растителни и животински видови во Националниот парк Галичица од негативните ефекти на климатските промени“, поддржан од Prespa Ohrid Nature Trust – PONT, а имплементиран од Црвен крст Охрид и Истражувачко друштво „Урсус спелеос“ – Скопје, во соработка со Јавната установа Национален парк Галичица.
Учество во оваа обука зедоа наставници од основни училишта и членови на невладини организации од охридско-преспанскиот регион. Во текот на работните сесии, коишто беа водени од експерти за опфатените теми, учесниците ги продлабочија своите знаења за природните вредности, биолошката разновидност и пештерските екосистеми во Националниот парк Галичица. Покрај тоа, учесниците проследија и предавања за влијанието на климатските промени врз Паркот, како и за мерките за спречување на и за справување со пожари.
Исто така, во текот на обуката, проектниот тим им ги претстави на учесниците едукативните ресурси изработени во рамките на проектот, а коишто ресурси едукаторите можат да ги користат за организирање едукативни активности за деца од основни училишта: два прирачници, две едукативни друштвени игри и пет едукативни видео-материјали, информираат од Црвен крст Охрид.
