Надојдената река Сушица поплави триесетина домови на улица Железничка. Под вода се куќи, дворови, земјоделска обработлива површина и домашни животни. Жителите стравуваат дека со најавите за утрешните врнежи и од топењето на снегот реката ќе носи поголеми количини вода. Се жалат дека и покрај досегашните барања до надлежните институции речното корито не било исчистено во последните 30 години.
Жителите од овој дел на градот велат дека домовите им се поплавуваат и заради инфраструктурни пропусти. Кажуваат дека со поплавите почесто се соочуваат по изградбата на улицата Железничка, по преместување на речното корито на Сушица, по непрописно поставување на шахтите за канализација која започнала минатата година и сеуште не е довршена.
За да се спречат и понатака слични поплави покрај механичка интервенција на коритото бараат и подигање на заштитен ѕид на коритото. Жителите од кракот на улица Железничка побарале помош од локалната и од ЦУК. Од Центарот за управување со кризи информираат дека не се во можност да интервенираат и за проблемот го известиле општинскиот кризен штаб уште во текот на вчерашниот ден.
