Се повеќе станува навика кај охриѓани своите годишни одмори да ги користат во есенскиот период. Од туристичките агенции велат дека покрај тоа што тие бараат дестинации каде можат да се сончаат и капат, сакаат да посетат и такви места каде едноставно ќе уживаат во природните убавини и ќе се одмараат после напорното лето. Во овој период од годината најпосетувани дестинации се Сандански и Банско, вели Јаким Маленко, од туристичката агенција ВисПој. За овие две дестинации има промотивни пакети по многу поволни цени за полупансион или за цел пансион и затоа граѓаните најмногу се одлучуваат да отпатуваат токму таму. Многу интересна понуда есенва била и таа за јужниот дел на Италија за која исто така имало заинтересирани граѓани, а за подалечните дестинации граѓаните потешко се одлучуваат поради променливите временски услови.
Интерес има, но со оглед на временските услови бидејќи некако 
малку порано ни дојде есента и зимата се намалува интересот за некои дестинации, вели Маленко.
Зa претстојните новогодишни и божикни празници охриѓани веќе почнуваат да се интересираат каде би можеле да отпатуваат и какви се аранжмани има во оваа туристичка агенција. Како најбарани места се земјите од нашето опкружување, но и егзотичните дестинации како Дубаи, Доминиканска Република, Куба и други, вели Маленко. 
Има граѓани кои имаат можности да одат на вакви патувања, но тој број не е многу голем, тоа се претежно индивидуални аранжмани кои се организираат по потреба и на барање на клиентите, не се во организирани групи и претежно се оди на индивидуални аранжмани со помал број патници, но сепак ги има, секогаш ги имало и ќе ги има и понатака, вели Маленко.
Маленко вели дека покрај тоа што нудат аранжмани за странство, нивна интенција е да привлечат што повеќе гости во Охрид. Тој е сигурен дека и оваа година Охрид ќе е привлечена дестинација за многу туристи и дека голем број гости, посебно од нашиот северен сосед ќе се одлучат престојните празниците да ги поминат токму овде.
