Поголем прилив на средства се очекуваат во домашната туристичка индустрија во 2023 година. Плановите на Агенцијата за промоција и поддршка на туризмот (АППТ), во соработка со чинителите во туризмот, се да оставарат 3,2 милиони ноќевања и 430 милиони долари прилив во државната каса.
За да се остварат поголеми приходи и да се следи предпандемискиот тренд, но и да се надминат годинешните реализирани 2,5 милион ноќевања, треба многу работа од сите чинители и промоција на потенцијалите во авантуристичкиот туризам, етно-гастро концептот и турите Отворен Балкан, најавува Љупчо Јаневски, директор на АППТ.
2023 ќе биде во некои сегменти продолжување на 2022 година, применување успешни практики во промоција на туризмот и воведување на нови елементи на туристичко претставување, но и валоризирање на дестинацијата и нејзино подобрување. Се повеќе ќе се работи на означување, валоризација и брендирање на дестинацијата и дополнително на дигитализација на туристичката индустрија која се наметнува како главен фактор за размена во туризмот кај нас, регионот, отворениот Балкан и Европа – вели Јаневски.
Претстои и работа во делот на надминување на слабостите во оваа индустрија. Меѓу слабите алки е недостатокот од туристичка промоција и реклама за туристичките потенцијали на странските пазари. Се зависи од буџетските средства кои се планираат за оваа година, а кои се во висина како и годинешните, вели Јаневски.
Доставивме информација до владата. Очекуваме да се направи државна кампања во туристичката индустрија во 2023 година. Да се фокусираме на Јутјуб и Гугл кампањи, преку интернет, со цел видливоста на нашата дестинација да е појака и посилна – додава Јаневски.
Наскоро ќе стартува кампања која ќе трае до февруари 2023 година за да се донесат гости во зимските центри од Полска, Србија, Бугарија, Албанија и Косово. За лето 2023 пак, ќе се работи на пазарите за враќање на традиционалните гости, но и на проширување на дестинациите во Англија, Романија, Грција, Турција, Израел, како и продолжување на престојот од едно на три ноќевања од гостите од Латинска Америка со туристичките рути од Отворен Балкан.
