Во моментов, шумскиот пожар во атарот на селото Велмеј е смирен, но не и ликвидиран, инфoрмираат од ЈП Македонски шуми. Стотина луѓе од Македонски шуми, пожарникари од ТППЕ Охрид, Јавното претпријатие Нискоградба и од Комунално Дебрца во изминативе денови беа ангажирани во борбата со шумскиот пожар.Појавата на вчерашниот ветар го распламти пожарот кој претходно беше локализиран, а според првичните проценки за пет дена огнот проголта над 100 хектари шума. Станува збор за пожар кој зафати густа шума од даб и нискостеблеста вегетација.
Непроодниот и тешко пристапен терен оневозможил да се интервенира со противпожарни возила по што се вклучиле двата авиони на Дирекцијата за заштита и спасување, но и луѓе кои го гаснеле пожарот. Синоќа, покрај вработените од Македонски шуми и пожарникарите во гасење на пожар се приклучиле и мештани од селото Велмеј.
Во моментов заради претпазливост шеесетина луѓе се распоредени на две линии и дежураат. На терен ќе останат се додека шумскиот пожар не биде ликвидиран, а будно се следат и временските прилики, информира Нада Митреска, директорот на ЈП Македонски шуми- подружница Галичица.
