Во неколку наврати од Левица Охрид пред советот на Општината се покренува иницијативата за обележување на службените возила. Од Левица, на седницата на советот во месец април, дури доставија и лепенки со кои би се извршило обележувањето.
„Ме интересира зошто Општина Охрид постојано одбива да ги обележи службените возила и сметам дека граѓаните треба да имаат увид барем во тој дел да видат дали се врши злоупотреба и како се трошат нивните пари.“ – потсети на иницијативата советничката од Левица, Виолета Аврамоска на последната седница на Совет посветена на советнички прашања.
Градоначалникот на Општина Охрид, Кирил Пецаков и одговори на советничката од редовите на „Левица“ дека, службените возила од Општина Охрид ќе бидат обележани.
„Не со оние лепенки кои ги дадовте, секако не само за граѓаните и мене ми е битно, иако јас речиси и да не ги користам. Не дека тоа е нешто со кое се фалам, но речиси и да не користам, блиску живеам до Општината, па освен за службени патувања и за некоја потреба која се случува. Како и да е, ќе бидат обележани, но не со лепенките кои ги дадовте, да бидам попрецизен.“ – кажа Пецаков.
Од Левица инаку информираа дека преку доставување на барање за пристап до информации од јавен карактер добиле информација дека Општина Охрид располага со 10 службени возила.
