Викендов (15/16.07.) во Охрид од страна на полициски службеници од Одделението за превенција при СВР Охрид, беше реализирана превентивна кампања – „Соседска патрола“. Мешаните патроли составени од полициски службеници, претставници на Советот на родители во основните училишта, од Секторот за образование при локалната самоуправа, како и претставници од Центарот за социјални работи, извршија превентивни обиколки на угостителските објекти како и на местата односно собиралиштата на отворен простор каде што во ноќните часови најчесто се собираат младите.
„Целта на кампањата беше родителите да видат каде и како младите се забавуваат во ноќните часови, какви се условите каде што излегуваат, кои угостителски и други јавни места најчесто ги посетуваат, кои се можните проблеми со кои се соочуваат, да се направи увид во однесувањето на нивните деца кога се надвор од домот, но и како полициските службеници практично ги применуваат своите полициски овластувања.“ – велат од МВР.
Притоа, полициските службеници затекнале повеќе малолетни лица кои по 24 часот консумираат алкохолни пијалоци поради што на правниот субјект и на одговорното лице, ќе им бидат поднесат соодветни пријави.
Инаку, целта на проектот „Соседска патрола“ е преку широка општествена акција да се зацврсти партнерскиот однос меѓу полицијата, граѓаните и локалната заедница, односно локалните институции, а во насока на придонесување кон зголемување на степенот на безбедноста, намалување на можните инциденти на местата каде што се забавуваат младите, и секако – подигање на општествената свест за одговорно однесување во угостителските објекти и на јавните места преку доследно почитување на законските одредби пред се, од Законот за прекршоци против јавниот ред и мир.
Во текот на летниот период, проектот „Соседска патрола“ ќе продолжи да се реализира на целото подрачје под надлежност на СВР Охрид.
