Состојбата во јавните установи во Охрид во поглед на технички услови и ПП заштита е добра

За еден ден надлежните институции ја спровеле вонредната контрола на кабареата, дискотеките и ноќните клубови во Охрид. Вкупно шест објекти, од кои еден диско клуб, три кабареа и два ноќни клубови биле предмет на инспекциски надзор.

На три објекти од исконтролираните им е изречена забрана за работа се до исполнување на минимално техничките услови. Засега општината нема конечни информации за тоа колку објекти реално ги исполнуваат законските прописи за извршување на дејноста.

„ Сите оние кои што имале лиценца за кабаре или дискотека во 2023 и 2024-та беа исконтролирани од страна на инспекциските служби и сето тоа заврши во рок од 24 часа. Инспекциските служби беа составени од полиција, Финансиската полиција, инспектори за противпожарна заштита од Дирекција за заштита и спасување и Пазарна инспекција.

Ние треба да го добиеме како податок, не само ние туку сите како институции во државава, па да знаеме во каква состојба се оние кои што веќе имале лиценца и кои во наредниот период ќе продолжат да работат.“ – вели Градоначалникот Пецаков.

Што се однесува пак до состојбата во образовните установи кои исто така ќе бидат контролирани на барање на Министерството за образование и наука, Пецаков вели дека во Охрид во изминатите 4-5 години со реконструкциите на училиштата биле изготвувани и елаборати за ПП заштита и истите се контролирани од страна на инспектор на Дирекцијата за заштита и спасување.

„ За сите недостатоци кои ги имале, имаше минатата недела состанок на лицето во Општина Охрид за безбедност заедно со претставници на училиштата. Доколку имаат недостатоци ќе се отстранат. Немам точен податок, но генерално состојбата во јавните установи, не само во училиштата основни, средни и градинките, па и во спортските објекти е добра. “ – вели градоначалникот.

Во станбените згради за колективно домување, периодов се работи од страна на Претседателите на Заедниците на станари или фирмата управител, на оспособување или ставање во функција на хидранстската мрежа. Посебно во постарите згради хидрантите се нефункционални, вон употреба , без црева и шибери и таа состојба треба драстично да се промени, вели Пецаков.

„ Општината е таа којашто треба да им препорача, бидејќи други се законите и инспекциите кои тоа го контролираат, наша работа е сепак во моменти кога се случи ваква трагедија кадешто покрај индивидуалната одговорност во смисла на начинот на кој се запали дискотеката со користење пиротехнички средства во затворен простор, секако дека се покажаа и одредени слабости во системот.“ – кажа Пецаков.

Деновиве ќе се спроведуваат инспекциски надзори и во хотели и објекти за организирање на прослави и настани со посебен акцент на утврдување на минимално техничките услови и категоризација на ресторани и за другите одредби од Законот за угостителска дејност.

Инаку, Владата донесе одлука да се направи контрола на сите издадени лиценци од страна на Минстерствата и институциите без разлика на што се однесуваат. По завршувањето на овие постапки, ќе следат законски измени со кои ќе се предвиди ваква контрола да се спроведува на секој 6 месеци.