Охридските советници утре со полни раце работа. Ќе ги спротиставуваат ставовите околу 37 точки колку што ги има на дневниот ред 58та седница на Советот на општина Охрид. Особен интерес и пожестока расправа се очекува за предлог-одлуката за утврдување на касовиот максимум во општинската благајна, точка која секогаш нуди интересни коментари и дискусии од страна на советниците. Освен оваа интересна точка, во останатиот дел од седницата ќе доминираат предлог-одлуките од урбанистичката сфера.
Ќе се утврдуваат нацрт-урбанистички планови вон населените места и тоа во Долно Лакочереј и во Елшани, населба Лагадин. Покрај тоа, ќе се гласа и за вкупно единаесет предлог-одлуки со кои ќе се утврдува потребата од измена на урбанистичко-планската документација, заради усогласување на намените на земјиштето и трасите на сообраќајната инфраструктура. Осум од овие единаесет кориснички парцели се наоѓаат во Охрид, а по една се наоѓаат во Рамне, Велестово и Коњско. На дневниот ред на утрешната седница се и 8 предлог-одлуки за утврдување на потребата од донесување урбанистичко-планска документација за вклопување на бесправни објекти изградени на парцели во Охрид, Велгошти, Лескоец, Опеница и Долно Лакочереј. Ќе се утврдува и потребата од измени на урбанистичко-планската документација заради усогласување на намените на земјиштето на кое се изградени бесправните објекти, и тоа во Охрид и Коњско.
Од сферата на урбанизмот ќе се гласа уште за предлог одлуката за утврдување на потреба од донесување на урбанистичко-планска документација за изработка на урбанистички план за село, како и за усогласување на намената на земјиштето предвидено со важечкиот генерален урбанистички план за строго заштитената зона Студенчишта, и заштитено зеленило. Советниците ќе го усвојуваат и извештајот за состојбата во областа на јавната безбедност и безбедноста на сообраќајот на патиштата од 1ви Јули до 31 Декември 2012 година, како и извештајот за слободен пристап до информации од јавен карактер за истата година. Ќе се гласа и за предлог-одлуката за пренесување на правото на сопственост од општина Охрид на ЈП Охридски комуналец.
{loadposition content9}
