Трета среќа. Оваа локална власт по трет пат во година и половина ветува дека граѓаните кои го користат градскиот превоз ќе добијат пристојно место за чекање. Во повеќе наврати пишуваваме дека автобуските постојки низ градов се во очајна состојба и дека охриѓани кои чекаат градски превоз најчесто се под ведро небо по што Локалната ветуваше дека за брзо овој проблем ќе биде решен. Последното ветување дадено во јуни беше дека со почетокот на летото Охрид ќе добие современи постојки. Летото помина, но со старите постојки. Сега Локалната со ново ветување.
–Изготвена е тендерската документација и испратена е до советот за јавни набавки кој треба да даде одобрение за распишување тендер откога ќе види дали постапката е усогласена со законските одредби. Веруваме дека тендерската документација ќе ги исполни сите законски барања и ќе пристапиме кон објавување на тендерот и замена на автобуските постојки, вели Томе Џамтоски, портпаролот на Локалната самоуправа.
Наместо 30 како што се ветуваше сега се планира да се направат 14 автобуски постојки во централното градско подрачје и тоа на улицата „Питу Гули“, на улицата „Јане Сандански“ и на булевар „Туристичка“.
-Оние кои сега се наоѓаат на булевар „Туристичка“ ЈП „Нискоградба“ ќе ги санира и ќе ги постави во приградските и селските населби на Општина Охрид, вели Џамтоски.
Џамтоски ветува дека пред почетокот на зимата граѓаните и градот ќе добијат автобуски постојки по европски терк. Но, само за потсетување. Од Локалната уште пред една година распишаа тендер за уредување на автобуските постојки, но тој беше неуспешен. Ништо подобро не завршија и останатите два. Останува да видиме како ќе заврши овој тендер ако воопшто биде распишан и дали конечно овој проект ќе се реализира или ќе е уште едно лажно ветување.
{loadposition content9}
