Тренинг за доброволни пожарникари и логистичка поддршка при справување со шумски пожари во заштитеното подрачје Споменик на природата „Слатински Извор” и Порече.
Во соработка со Територијалната противпожарна единица на Македонски Брод, на претходно утврдена и безбедна локација реализиравме теренско предавање за употреба на средства и тактики за гаснење на шумски пожари (напртњачи, метли за гаснење)а воедно практично пробавме како се гаси пожар и со теренско противпожарно возило.
Активноста е реализирана во рамките на проектот Заштитени подрачја за природата и луѓето, имплементиран од WWF Adria со поддршка на СИДА, Шведската агенција за развој и соработка.
По завршување на симулациската вежба за гаснење на шумски пожар на територија на општина Македонски Брод, тимот на ИД Урсус спелеос и заштитеното подрачје Споменик на природата „Слатински Извор“, како дополнување на постоечката опрема, достави на користење противпожарни метли и лопати до Територијалната противпожарна единица во Македонски Брод.
Опремата може да се искористи за зајакнување на капацитетите и гаснење на пожари во заштитеното подрачје Слатински Извор како и поширокиот регион на Македонски Брод.
Истражувачкото друштво „Урсус спелеос“ во текот на изминатите години континуирано работи на заштита на подрачјето на Споменикот на природа „Слатински Извор“ преку превенција, подигнување на свест, дејствување при шумски пожари и мониторинг со дрон.
