Денес, божественото парче земја, високо таму во Скребатно со својата убавина на едно место обедини луѓе од најразлични краеви. Од домашно, локално население, до туристи од земјава, но и од странство. Денес, Скребатно беше домаќин на манифестацијата Охридска софра 2013. Како дел од неа, 26 натпреварувачи, мајстори во правење на ѓомлезе, или тури-потпечи како што е инаку познато ги покажаа своите вештини во подготовката на ова традиционално охридско јадење. 
„Нема тајна. Внимание на печењето, да не се изгори, мрсење на време и тоа. Нема никаква тајна. Вода, сол, брашно, тоа е. Нема други додатоци. Некои додаваат млеко, јајца, ама не е убаво тоа. Ова е традиционално и природно.“
„Неколку години по ред се одржува оваа традиција. Традицијата треба да ја одржуваме до крај. Оваа година се вика Охридска софра, повеќе жени сме. Убава е оваа традиција, се работи природно, само сол, вода и брашно, и е вкусно за јадење.“
„Едно два, до два и пол часа се потребни. Најпрво се зоврива масло, па се тура кашата, се пече под сач и така се додека не се наполни тепсијата.“
„Внимателност, запазување на старите традиционални рецепти, од баба, од мајка. Сепак ова е тешка работа, сметам дека мажите за ова се најдобри и треба да го работат ова.“-рекоа дел од натпреварувачите.
Посетителите пак воодушевени, и од местото, и од манифестација, и секако од ѓомлезето.
„Манифестацијата ми се допаѓа, бидејќи прв пат доаѓаме тука на ова прекрасно место, и баш ни е мило што ваква манифестација се одржува. Ѓомлезето беше извонредно и им честитаме на победниците.“
„Јас сум тука по втор пат, добро е, убаво.“
„Прекрасно, манифестацијата е прекрасна, местото е прекрасно, воодушевени. Со еден збор, прекрасно.“
„Вакви организации тешко се случуваат. Ова треба на секои пет месеци да се одржува. Благодарение на вас кои ги пренесувате овие работи и благодарение на локалната, народот се собира на вакви манифестации и ќе заборави на сите проблеми во животот.“-велат задоволните гости.
„Ако ги запрашате луѓето кои доаѓаат во Охрид од надвор од што најмногу се задоволни, ќе ви кажат дека се тоа две работи. Тоа е гостопримството и вкусната храна. Од тие причини денес имавме можност да направиме еден спој на гостопримството и вкусната храна и со тоа да ја продолжиме традицијата од овој крај.“ Со овие зборови на гостите им се обрати градоначалникот на Охрид, Никола Бакрачески. Тој порача дека токму од овие причини, локалната ја продолжува оваа убава традиција.
„Се надевам дека со организацијата на оваа манифестација даваме значаен допринос во збогатување на туристичката понуда што Охрид им ја нуди на гостите и туристите кои што престојуваат овде и ние во иднина имаме намера со слични вакви манифестации да ја збогатиме истата и да ја подржиме секоја иницијатива не само на локалното население кои живее во градот Охрид, туку и околните рурални места со што ќе дадеме исто така значаен допринос во развој на руралниот туризам кој зазема едно од повисоките места во нашата агенда за развој на туризмот.“-вели градоначалникот Никола Бакрачески.
Тој воедно беше и дел од жирито кое го оценуваше приготвеното ѓомлезе. Од 26те учесници, за најуспешни и надобро подготвени беа прогласени ѓомлезината на Љубица Ѓузелоска која беше трета, Крсте Кантароски, кој беше на второто место, додека највкусно ѓомлезе според жирито имаше Љубица Китеска.
Инаку покрај подготвувањето на вкусното ѓомлезе, на Охридска софра имаше и неколку штандови за млечни производи, еден штанд на кој имаше вкусен природен мед. Со здрава храна подготвена од своите студенти се претстави и Факултетот за туризам и угостителство. На манифестацијата, со своите рачни изработки се претстави и Регионалната занаетчиска комора која обезбеди и награди за победникот во натпреварот во приготвување ѓомлезе, но и за сите други учесници. Инаку за доброто расположение, како дополнување на амбиентот, гостите ги забавуваше познатиот етно состав Љубојно, како и надежните охридски музички таленти од Билјана јуниор.
{loadposition content9}
