Охрид добива нов урбан лик, заврши реализацијата на проектот за визуелна унификација на урбана опрема

Општина Охрид го заврши проектот за визуелна унификација на урбаната опрема, со што градот добива посовремен и поуреден изглед. Во рамки на активностите, заменети се вкупно 290 огласни табли на улиците „Цар Самоил“ и „Коста Абраш“, на Градскиот плоштад долж „Св. Климент Охридски“, како и во Старата чаршија на улицата „Гоце Делчев“.

Градоначалникот Кирил Пецаков упати благодарност до занаетчиите, трговците и угостителите за поддршката во реализацијата на проектот, нагласувајќи дека со ова Охрид добива лик каков што заслужува.

Визуелната унификација на урбаната опрема се врши според донесениот Правилник и каталог за стандардизација со кои детално се пропишани видот, типот и карактеристиките на опремата со цел создавање на препознатлива и уредена урбана текстура на јавните површини. Целта на локалната самоуправа е да воспостави долгорочен ред и естетика во урбаното уредување, што е особено важно за туристички град како Охрид.