Велосипедска тура околу Охридското Езеро по повод Денот на Европа

По повод Денот на Европа, на 16 мај ќе се одржи велосипедска тура околу Охридското Езеро на релација Струга–Поградец–Охрид–Струга, во должина од 90 километри.

Настанот ќе започне во 08:00 часот, а организатори се Europe House Struga, во соработка со Општина Струга и Спортскиот клуб „Соларис“.

Организаторите најавуваат заедничко возење низ трите градови, можност за нови познанства, како и освежување и музички пунктови долж трасата, со цел турата да понуди дополнително спортско и забавно доживување за учесниците.

За безбедноста на велосипедистите ќе бидат обезбедени полициска и медицинска поддршка, а за сите учесници се предвидени и брендирани материјали. Турата ќе заврши со заеднички финиш и ручек.

– Придружете ни се на турата околу Охридското Езеро и бидете дел од заедничко искуство што поврзува, порачуваат организаторите.