Во тек е вештачкиот мрест на Охридската пастрмка. Ловот и оплодувањето на собраната икра го спроведува ЈНУ Хидробиолошкиот завод Охрид како овластена установа од областа на рибарството и регистриран репроцентар за производство на репродуктивен и порибитилен материјал, информира директорката на заводот Елизабета Сарафилоска. Ловот се спроведува вообичаено на риболовни локалитети во Охрид, Пештани и Трпејца, укажува Сарафилоска.
„ До овој момент на споменатите локалитети се уловени вкупно 388 единки од кои 191 женка и 197 машки единки. Од истите се колекционирани и оплодени 530.000 зрна икра“, информира Сарафилоска.
Според предвидените активности до завршување на мрестот треба да се обезбедат 2.200.000 зрна икри. Риболовот и покрај студеното време се одвива според планираните активности, додава Сарафилоска.
„ Реализацијата и динамиката на изведување на задачите зависна е од временските услови во тековниот период и од природата на мрестот. Тековно излегуваме секојдневно, а самиот процес на колектирање на икрата ќе трае до 20 март “, вели Сарафилоска.
Министерството за земјоделство, шумарство и водостопанство треба да обезбеди 8 милиони денари според програмата за финансиска поддршка во рибарството и аквакултурата врз основа на одобрението за риболов во научно истражувачки цели. Исплатата на средствата го врши Агенцијата за финансиска поддршка во земјоделството и руралниот развој.
