Во Националниот Парк Галичица се забележани првите две рожби на елените од репродуктивниот центар. Вработените од паркот се на терен и ги пребројуваат новородените еленчиња. Центарот со површина од 86 хектари од декември 2019 година е дом на 30 елени од кои 24 се женки и 6 мажјаци, информира Андон Бојаџи од НП.
„Според техничката спецификација од тендерот требаше да бидат бремени. Се потврди и кон крајот на месец мај и почетокот на месец јуни се породуваат. Вработени на паркот се на терен и ќе се обидат да констатираат колку млади се родени“, вели Бојаџи .
Во зимскиот период елените добро се адаптрирале во репродуктивниот центар. Тој е опремен со модерна инфраструктура: карантин, хранилишта, поилишта, солишта и набљудувачници,а за нив се грижи и ветеринар со искуство во одгледување на елени, вели Бојаџи. Појаснува дека вработените се на терен и утврдуваат колкав е точниот број на подмладокот во паркот.
„Камерите кои ги имаме поставено регистрираа две, но возможно е да се повеќе. Камери имаме поствено на неколку локации. Не го покриваат цел терен , многу е голем“, вели Бојаџи.
Проектот за Репродуктивниот центар е вреден 340.000 евра и е дел од Програмата на Европската унија „Подобрување на управувањето со заштитените подрачја”. Репродуктивниот центар и елените според проектот ќе се користат исклучиво за активно управување на планинските тревести еко-системи, а не како ловиште.
