Со презентација на тема: Обработка, презентација и негување на културниот идентитет на Врање, бибилотекари од Врање, соседна Србија, деновиве во НУ Градска Библиотека „Григор Прличев“, ја продолжуваат работната посета, како дел од проектот со кој Охридската Библиотека конкурираше и го доби, од Министерството за култура, во рамки на годишната програма за работа во оваа 2023 година. Соработката меѓу двете установи, паралелно се одвива на неколку нивоа, преку релаизација на голем број активности.
„Ние како институција сме заинтересирани за она што тие го имаат како напредок, дигитализацијата на нивниот книжен фонд. Проект кој ние го прифативме, токму со нивна помош. А, ние пак, им помогнавме во она во кое сме малку понапред, а тоа е заштитата на старите и ретки книги, проект кој исто така го финансира Министерството за култура, проект со чија реализација сме речиси при крај.„Со нашето гостување во Врање, однесовме еден дел од македонска литература која им ја подаривме, а тоа се случи и обратно. Ги збогативме нашите фондови и со Македонска и со Српска литература“, – објасни м-р Милчо Јовановски – НУ „Градска Библиотека Григор Прличев“.
Јовановски информираше дека при посетата во Врање, донирани се и литературни изданија за македонското друштво кое функционира во Врање. Во план е размена на програма која се однесува на современата книжевна сцена, односно, можност, писателите од Врање, кои имаат значајно место на српската литературна сцена, да се пртстават во Македонија, рече Зоран Најдиќ, Директор на Јавната Установа Библиотека „Бора Станковиќ” од Врање.
„Ние реализиравме неколку кампањи, кога станува збор за дигитализацијата. Еден доста обемен и сериозен процес од кој произлегуваат голем број обврски, кои ние како културна установа која претендира да биде еден од лидерите на културната политика, да ја споиме традицијата со современите технологии. Да бидеме први, кои книжниот фонд ќе го обработат и афирмираат“, – кажа Зоран Најдиќ – Директор Јавната Установа Библиотека „Бора Станковиќ” од Врање.
Ваквите институционални соработки, во било кое поле од општественото живеење, се можност за дополнително продлабочување на и онака одличната соработка помеѓу Србија и Македонија, кажа Михајло Филев, почесен конзул на Србија во Македонија.
„Денеска сум среќен и горд што можеме да ги примиме нашите приајтели, браќа и сестри од соседна Србија, Зоран Најдиќ – Директор на Јавната Установа Библиотека „Бора Станковиќ” од Врање и нашиот добар домаќин, м-р Милчо Јовановски – НУ Градска Библиотека „Григор Прличев“, во еден прекрасен проект кој го започнаа во Врање, пред три месеци. Проект кој ќе придонесе за една културна соработка меѓу двете библиотеки. А ќе се отвори со тоа уште едно поглавје за повеќе библотеки да се вмрежат во реализацијата на повеќе проекти“, – изјави Михајло Филев – Почесен конзул на Србија во Македонија.
Во таа насока, наскоро, охридската библотека, во соработка со Националната установа Градската библиотека „Кочо Рацин“ од Тетово, ќе бидат дел од еден трилатерален проект со сродни културни установи од Котор, Црна Гора и Корча од соседна Албанија.
