Работниците на Комуналец и другите јавни претпријатија денес сечеа гранки на дрвја и грмушки покрај патиштата. Денешната акција за чистење на зеленилото започна на неколку локации во градот и приградски населби, а ќе се одвива и на крајбрежјето. Итна е потребата од кастрење на гранките и разеленетите плотови на патот кој ги поврзува населбите Видобишта и Велгошти, информира секретарот на Локалната самоуправа, Димитар Спасески.
Појаснува дека освен на оваа локација се работи и во стариот дел на градот на потегот од црквата Каменско до Горна Порта. Во план е расчистување на зеленилото и на паркот кај плажата Немо, потоа на пешачката патека кон Горица, каналот Студенчишта и на потегот на зелениот појас од Билјанини извори до Св. Стефан.
„ Со овие масовни акции сме уверени дека ќе дадеме нов лик на градот. Ќе изгледа средено и ќе дадеме придонес за поуспешна туристичка сезона. Споменатата акција е наменска и се надоврзува на тековните активности на Комуналец“.
Акцијата за расчистување ја спроведува ЈП Комуналец, а вклучени се и работниците од останaтите ЈП, Проаква, Нискоградба и Билјанини извори. Покрај редовните работници на Комуналец дополнително се вклучени и околу 100 -тина вработени од останатите три претпријатија, кажува Спасески. До почетокот на официјалната туристичка сезона покрај средувањето на јавните зелени површини ќе заврши и започнатото крпење на ударните дупки на охридските улици, напоменува Спасески.
„ Оние улици што беа најкритични се санирани. Го разгледав планот и програмата за крпење на дупките и динамиката задоволува. Санирање на дупки ќе има на сите улици, а согласно Програмата на Локалната самоуправа ќе има и поставување на асфалт на улиците“.
Секретарот на Локалната самоуправа, Спасески е задоволен од динамиката со која се одвива во моментов крпењето на ударните дупки на оштетените градски улици. Ситуацијата е критична на скоро сите градски улици, но најлоша е на патниот правец кој води кон Свети Наум.
{loadposition content9}
