Три фестивалски денови на кои се одржаа повеќе поетски читања на автори од земјава и странство го одбележаа годинешното 34-то издание на „Поетската ноќ во Велестово“.
Манифестацијата, што се одржа викендов, започна со поетски портрет на Лидија Димковска и изложба на Никола Пијанманов. Музички настап имаше Горан Папаз, а беседа за творештвото на Димковска одржа Сашо Огненовски.
На фестивалот се одржаа повеќе поетски читања на кои учествуваа и поетите Ким Симонсен (Фарски Острови), Алеш Мустар (Словенија), Мањола Наси (Албанија), Селахатин Јолгиден (Турција), Валентина Бакти (Србија), како и македонските поети Диме Данов, Ана Голејшка Џикова, Зоран Јакимоски и Јулијана Величковска.
Во рамки на фестивалот се одржа и работилница за креативно пишување и иновативно интерпретирање поезија со учество на млади од Охрид и регионот, како и ученици од охридската гимназија „Св. Климент Охридски“, во рамки на проектот „OH READ ‒ Поетски викенд и работилница за млади од регионот“ поддржан од програмата на РЕАД (Регионална Мрежа за Културна Разновидност) и Европската Унија.
Фестивалот беше заокружен со интернационалното поетско читање „Поезија ‒ Залез“ што се одржа на 21-ви август во тремот на црквата „Успение на Пресвета Богородица“ во село Велестово.
