Охрид туристичката сезона ја започна со избледени пешачки премини, а на повеќе места хоризонталната сигнализација е дури и невидлива. Вообичаено, обновувањето на хоризонталната сигнализација се прави пред сезона и се изведува еднаш во текот на годината, а годинава, бојадисувањето започна во екот на сезоната. Пред 3-4 работни денови започна обновувањето на пешаките премини на улиците Јане Сандански, Булевар Туристичка и на поголемите улици во централното градско подрачје. Процесот на бојадисување се одвива претежно во вечерните часови, напоменува Љупчо Танески од Секторот за комунални дејности . Тој, како една од причините зошто порано не се почнало со бојадисувањето на хоризонталната сигнализација посочува дека годинава таа постапка била посложена, а со тоа и јавната набавка. 
„ Причината за постапката на хоризонталната сигнализација почна во втората половина на јули е обемноста на тендерот и проширување на јавната набавка. Ако се земе предвид дека тендерот беше од помал обем лани, а годинава од одделението за сообраќај одлучија дека треба да се обнови хоризонталната сигналзиација на повеќе улици низ градот. Опфатени се околу 20 -30 посто повеќе улици“, наведува Танески.
Од одделението за сообраќај се амнестираат од одговорност за доцнењето на зафатот. Прашавме дали тоа се должи на нечиј пропуст или затајување на проценката, и не можеше ли истата да биде реализирана пред стартот на летната сезона кога вообичаено се бојадисува хоризонталната сигнализација.
„ Она што ние како одделение за сообраќај го изработуваме е утврдување на динамиката и планот за бележење и достава до одделението за јавни набавки за обемноста и сложеноста на јавната набавка. Од страна на секторот за комунални дејности се беше навреме изработено. Тоа е и дел од годишната програма за работа на секторот. Затајување во делот на секторот за комунални дејности и некакво доцнење нема воопшто“, дециден е Танески.
Секторот за комунални дејности барањето за обновување на хоризонталната сигнализација го поднесол на 5 мај до одделенеито за јавни набавки. Од таму пак барањето веднаш го проследиле, но за запазување на целата законска процедура за спроведување на тендерот биле потребни 57 дена. Така , општината и најповолниот понудувач склучиле договор за изведуање на работите на 7 јули. По извршените подготовки започнала реализацијата, појаснува Танески.
За годинешното бојадисување како најповолен понудувач е избрана струшката „Ала компани“. За годишнешниот зафат согласно потпишаниот договор од тендерската докуменатција општината од буџетот ќе издвои 1.900.000, оо денари, напоменува Танески.
