Жителите на охридско Подмоље бараат санација на патот. Се жалат, со години влезот во охридското село, денес современа викенд населба со над триста куќи и апартмани, е потполно руиниран.
Од огромните дупки на асфалтот им се оштетуваат возилата, а сликата е лоша и за бројните туристи, кои го посетуваат главниот туристички центар.
„Тоа е едно парче не подолго од дваесеттина метри. Тоа не изискува некои огромни средства а угледот на Охрид ке биде сочуван бидејќи тој ни е бисер на Балканот и заштитен од Унеско. Се надевам дека ќе сторат нешто надлежните на прагот на Охрид е овој проблем и ќе се направи нешто” – вели Сашо Димитровски, сопственик на куќа во Подмоље.
Реконструкцијата на овој патен правец, пред влезот за Подмоље и Охрид е во надлежност на ЈП за државни патишта.
„Ги молиме надлежните, тие се препукуваат општина Охрид вика не е во наша надлежност, ЈПДП вика тоа не знаеме. Работата е од тато на мама, мама на тато, детето без капа. Ако може за овие триста фамилии и охриѓани ќе ни бидат благодарни да се направи тој дел од патот”, вели Димитровски.
И оваа сезона поради изградбата на автопатот Охрид – Кичево, влезот во главниот туристички центар во земјава е во очајна состојба. Од ЈП за државни патишта велат веќе се изработува техничко решение за санација на тој патен правец.
Новинар Соња Рилковска
