Во Охридското Езеро уловени се примероци на кинески вид риба Толстолобик. Спортските риболовци предупредуваат дека овој вид риба е неавтохтона и може да предизвика сериозни последици посебно врз охридската пастрмка. Примероци од овој вид риба пронајдени се во Радожда, Пештани и на Далјанот во Струга. Претседателот на здружението Радован Димитриески смета дека треба да се вклучи црвениот аларм за спас на езерото
„Останува енигмата како овој вид на риба кој е карактеристичен за во Кина и кој само таму се размножува во реката Амур како стигна во водите на Охридското Езеро. Претежно тој се носи со порибителен материјал од крап но Охридското езеро не е порибено над 10 години и затоа останува енигма како е донесен овде. Многу е страшно што е уловена во време на вештачкиот мрест во тој дел каде се движи и пастрмката тој освен што се храни со планктонот се храни и со едноклеточни организми и алги исто се храни и со икра, така да претставува голема опасност за уништување на рибниот фонд на Охридското езеро“. -вели Димитриески.
Доаѓањето на рибата е овозможено по пат на човекот бидејќи ја внесол во сливното подрачје на Охридско езеро дали за одгледување во некои рибници, рече Зоран Спиркоски-Хидробиолошки институт Охрид. Додаде дека нејзиното место не е во нашето езеро.
„Примероците кои се фатени кај нас укажуваат на риба од една година возраст и се со 38 сантиметри. Таквата риба дава и до 100 илјади зрна икра но се надеваме дека во нашиов случај во езерово не би можела да опстојува природно да се размножува бидејќи и по другите езера каде што сакале да ја размножуваат не се размножила. Но од друга страна имаме еден познат факт дека навистина таа знае да биде своевиден плевел риба и да направи штета, бидејќи како што е познато во дел од притоките на америчките големи езера веќе се наоѓа и е распространета и со неа се јавуваат доста големи проблеми бидејќи зафаќаат еколошки ниши на другите риби кои што нормално живееле во тие води “ – изјави Спиркоски.
Спиркоски појасни дека азиската риба карактеристична е по тоа што расте брзо, а цревата и се за 15 пати подолги од телото. Ја има во сива и бела боја. Асоцијациите и организациите кои се занимаваат со рибниот фонд ќе бараат одговор за потеклото на внесувањето на оваа риба во Охридско езеро, но тој процес како што нагласи Спиркоски тешко се откривал а постоело можност и никогаш да не можат да го откријат внесувачот.
