Светската гастрономија се оддалечува од луксузот и се приближува кон природата и традиционалните рецепти

Зелената транзиција е иднината на гастрономијата. Локалните производи и традиционалните рецепти  се  во фокусот на светската кулинарска сцена. Ова е главната порака што  познатите  шефови  им ја пренесоа  на студентите и угостителските работници во Охрид.

Класичниот концепт на луксуз и Мишелин ѕвезди ги заменуваат  традиционални рецепти.

-Главната поента на готвењето е да се разбере готвењето, да се земе од на фарма од градина и да се подготви вкусна трпеза која ќе им се допадне на луѓето. Мишелин ѕвездата е како шлаг на торта ако ја имате е убаво, но таа не ве менува , вели Филип Ондрушек од Австрија шеф со Мишелин ѕвезда.

– Многу ми се допаѓа македонската храна. Појадокот наутро е прекрасен вкусив повеќе рецепти со  пилешко, телешко, колбаси се е феноменално, вели Д-р Мичел Елиот професор по гастрономија од Америка.

Во фокусот на новите трендови е максималното искористување на храната и намалувањето на отпадот. Наместо фрлање на делови од намирниците, тие добиваат нова вредност во подготовката на специјалитети.

-Друг проблем е што во нашите угостителски објекти многу малку нудиме вакви локални приказни. Најчесто истите познати јадења се нудат во сите ресторани, а локалните намирници не ги добиваат вниманието што го заслужуваат – охридскиот домат, охридската цреша и многу други производи. Но сето тоа треба да биде сервирано на модерен начин . Велиме дека минатото треба да се спои со иднината. И она што е особено важно во овој момент е „zero waste” менаџментот, за кој ние речиси и да немаме доволно знаење. Целта на овој час е токму тоа да се потенцира, вели професорката Ангела Паскуале Крстаноска.

Охрид треба подобро да ги искористи сопствените гастрономски потенцијали. Наместо унифицирана понуда, треба да го гради својот препознатлив идентитет преку локалните производи и традиционалните рецепти, сервирани на современ начин.

Новинар Соња Рилковска