И општина Дебрца ќе добие плажа
И општина Дебрца ќе добие плажа.
Современо уредена плажа ќе добие и општина Дебрца. Плажата се наоѓа во атарот на селото Оровник во должина од 500 метри веднаш под аеродромот „Св. Апостол Павле“, напоменува градоначалникот Игор Трајкоски 
„ Со плажата во атарот на селото Оровник и општината Дебрца ќе добие сопствена плажа на Охридското езеро. Очекуваме селото Оровник да прерасне во туристичка населба“, истакнува Трајкоски.
Уредувањето на плажата е на барање на општина Дебрца. Министерството за транспорт и врски денес објави јавна анкета на која ќе се избира најдоброто идејно архитектонско урбанистичко решение за уредување на плажата. За плажата се изготвени пет идејни решенија. Од Министерството ги повикуваат сите заинтересирани граѓани да ја искористат можноста за електронско гласање на интернет страницата mtc.gov.mk. Плажата ќе се гради согласно највисоките туристички стандарди. Планирана е рамна песочна површина, со автохтон песок, зеленило, хортикултурно и партерно уредување со клупи, фонтани за вода, детски игралишта, пешачки патеки од монтажно – демонтажни материјали. Плажата ќе биде од големо значење за туристички и економски развој на општина Дебарца и отварање на нови работни места, напоменува градоначалникот Игор Трајкоски.Посочува и други инвестиции во туризмот на општина Дебрца.
Ние сме општина со голема територија која може да понуди многу во туризмот. Покрај уредувањето на плажата, се планира уредување и на блатото во локалитетот Сини Вирој во близина на Белчишта, како и издавање на одобренија за изградба на винарски визби со кој би се развивал винарскиот туризам“, кажува Трајкоски.
Се очекува по завршувањето на сите законски процедури плажата да биде издадена под концесија веќе од следната туристичка сезона. Од Министерството за транспорт и врски напоменуваат дека при изградбата на плажата посебно внимание ќе се води да не се наруши еко-интегритетот на околината. Во нејзина близина поминува колекторскиот систем.
{loadposition content9}