Паушално се обвинува за „геноцид“ на децата што ќе се вакцинираат и тоа со состојка која во Фајзеровата вакцина ја нема!

Во постот што го рецензираме, изнесено е скандалозно тврдење дека вакцинацијата на децата против ковид-19 претставува „планирано убиство на децата во Македонија“.

    Најавија над 1000 родители кои би ги пријавиле и своите деца?! Графен оксидот е главната причина за смртноста, како главна состојка на Фајзер и Астра Зенека, што сакаат да ја дадат на нашите деца по директива на Калето, а главни промотори Филипче и други лекари, заедно со медиумите кои лаат 24/7. Ова е директива за убиство на нашите деца! Геноцид!, се тврди во постот.

Меѓутоа, во земјава е најавено дека исклучиво децата на возраст од 12 до 16 години ќе се вакцинираат со вакцината на производителот „Фајзер“, која што е одобрена за оваа возрасна категорија од страна на Европската агенција за лекови, ЕМА, по направени студии и клинички тестирања. Вакцината на Астра Зенека, спротивно на она што се тврди во постот, не се администрира во Македонија на помлади од 60 години и дефинитивно нема да се администрира кај деца. Вакцинацијата на децата не е задолжителна, а пријавувањето го прави родителот, затоа што вакцините на „Фајзер“ доаѓаат во вијала од која се екстрахираат шест дози и се сака да се избегне фрлање на дозите, кои мора да се искористат во одреден временски период по отворањето.

Невистинито е тврдењето, изнесено во постот, дека графен оксидот е главна состојка на вакцината на „Фајзер“ и дека истиот е главна причина за смртноста.

Претставник на „Фајзер“ за Асошиејтед прес ијзави дека во нивната вакцина нема графен оксид. Студијата со која се прави обид да се „поткрепи“ тврдењето дека во Фајзеровата вакцина има графен оксид, не е прегледана од медицинската заедница (не е peer-reviewed), ниту, пак, е поддржана од Универзитетот во Шпанија, Алмерија.

Графен оксидот не е во листата на состојки во вакцината против ковид.

Кит Лонгли, менаџер за наука во „Фајзер,“ за Асошиејтед прес изјави дека оваа состојка во нивната вакцина не постои. Истото го потврдиле и хемиски и медицински експерти, кои што не се поврзани со компанијата „Фајзер“.

Не е во листата на состојки, и нема никаква можност да биде присутна во вакцината, изјавил Ален Мајерсон, професор по хемиски инженеринг во Масачусетс Институтот за технологија.

Експертот за вакцини, Пол Офит, од детската болница во Филаделфија, додал дека ова тврдење е чиста глупост.

Доктор Амеш Адаџа специјалист за инфективни болести од „Џонс Хопкинс“, тврди дека имало истражувања за потенцијалното користење на графен оксидот во други вакцини, но количините не биле во доволно големи дози за да предизвикаат токсичен ефект.

Во постот кој го рецензираме, прикачен е линк до предлог за вакцина, но, тој воопшто не се однесува на Фајзеровата вакцина која што ќе се аплицира во Македонија за децата на возраст од 12 до 16 години исклучиво со информираана согласност на родителот!

И реномираниот „Форбс“ магазин како невистинито го оцени тврдењето дека во Фајзеровата вакцина има графен оксид.

Од сето ова може да се заклучи дека тврдењето дека вакцинацијата во земјава за децата претставува планирано убиство. Невистинито е и дека вакцината на „Фајзер“ содржи состојка графен оксид.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар