Вакцините функционираат, никој не тврди дека се 100 отсто ефикасни

И невакцинираните и вакцинираните можат да заболат и да го пренесат вирусот, со тоа што разликата во исходот од болеста може да биде многу поразлична за овие две групи. Сепак, најголемиот ризик за трансмисија е меѓу невакцинираните, за кои е поверојатно да заболат и да го пренесат вирусот. Ниту една одобрена вакцина против ковид-19 не е 100 отсто ефикасна и тоа досега никој не го тврдел. Делта сојот ја промени, односно ја намали ефикасноста на вакцините, но тие сè уште во најголем број на случаи спречуваат тешка клиничка слика, хоспитализација и смртен исход.

Фејсбук објава шири дезинформации дека вакцините не се функционални и манипулира дека невакцинираните не им прават штета на вакцинираните.

Послем 3 примени вакцини и да веруваш во приказни дека не си заштитен од короната само поради тоа што постојат луѓе кои не се вакцинирани, е крајноста на идиотизам. Едноставно вакцините не се функционални, а дали се штетни ……. допрва ќе се знае.

Текот на пандемијата со коронавирусот (на која со вакцините требаше постепено да ѝ дојде крај), го поремети појавувањето на новиот сој на вирусот кој беше наречена делта.

На 31 јули, Центарот за контрола и превенција на болести на САД, истакна дека делта варијантата на коронавирусот е исто толку заразна, како и сипаниците и дека инфекциите кај вакцинираните може да се исто толку преносливи, како и кај невакцинираните.

Од појавувањето на овој нов, многу позаразен сој произлезе дека и невакцинираните и вакцнираните можат и да се заболат и да го пренесат вирусот, со тоа што разликата во исходот од болеста може да биде многу поразличен за овие две групи. Сепак, најголемиот ризик за трансмисија е меѓу невакцинираните луѓе кои е поверојатно да заболат и да го пренесат вирусот.

Агенцијата, исто така, потенцира дека вакцините се високоефективни во превенција на инфекции, сериозна болест и смрт. Центарот за контрола и превенција на болести посочува дека иако вакцинираните се во помал ризик да се разболат, сепак, можат да го пренесуваат коронавирусот на другите, на ист начин како и невакцинираните.

Ниту една одобрена вакцина против ковид-19 не е 100 отсто ефикасна и тоа досега никој не го тврдел. Делта сојот ја промени, односно ја намали ефикасноста на вакцините, но тие сè уште во најголем број на случаи спречуваат тешка клиничка слика, хоспитализација и смртен исход.

На 17 септември ЦДЦ објави анализа на неколку студии спроведени во САД и други земји за ефективноста на вакцините против делта варијантата. Во анализата се вели дека од појавувањето на делта сојот, ефективноста на вакцината против хоспитализација се движи од 75 до 95 отсто, а ефективноста против инфекцијата се движи од 39 до 84 отсто – во зависност од регионот. Пред делта сојот, тој опсег се движеше од 84 до 97 отсто ефикасност против хоспитализација и од 72 до 97 отсто ефикасност против инфекција.

Ова особено влијае на имунокомпромитирани луѓе, кои имаат умерено до сериозно ослабен имунолошки систем и се особено ранливи на ковид-19 и можеби нема да изградат исто ниво на имунитет од вакцините, во споредба со луѓето кои не се имунокомпромитирани. Нивниот контакт со невакцинирани лица кои се заболени од вирусот може да биде особено опасен.

Ова значи дека невакцинирано лице, кое е заразено со ковид-19, претставува најголем ризик за оние кои, исто така, се невакцинирани, но претставува ризик и за вакцинираните, бидејќи вакцините не се 100 проценти ефикасни. Така што, постои можност невакцинирано лице да зарази вакцинирано лице – особено ранливите, како што се постари лица и лица со ослабен имунитет.

Дека вакцините се ефикасни и не се штетни потврди и проф. д-р Александар Петличковски од Институтот за имунобиологија и хумана генетика, на трибина на тема „Вакцинација и предизвици со ковид-19“.

Сигурен 100 процентен ефикасен третман уште немаме, но имаме некои јасни ставови за тоа дека вакцинацијата е најдобриот пристап во справување со епидемијата. Вестите и приказните за несаканите ефекти од разните видови на вакцини одеа циклично. Која вакцина ќе станеше достапна и популарна веднаш беше поврзувана со некои страшни приказни, многу од нив комплетно неосновани. Тие приказни се појавувале и ќе се појавуваат, не очекувам да застанат, но на овие милиони па и веќе милијадри покриени жители со вакцини, кога ќе ги сумираме бројките веќе гледаме дека станува збор за исклучително ретки случаи – кажа Петличковски.

Емануел Голдман од одделот за микробиологија, биохемија и молекуларна генетика при Медицинскиот факултет од Њу Џерси дел од Државниот универзитет во Њу Џерси, вистинската опасност ја гледа во идна варијанта на вирусот, која ќе биде предизвикана од оние луѓе кои не се вакцинираат и со тоа обезбедуваат почва за вирусот да продолжи да генерира варијанти. Тој во отворено писмо предупредува дека тоа може да предизвика да се појави варијанта која е отпорна на сегашните вакцини, со што веќе вакцинираните повторно ќе бидат подложни на сериозна инфекција.

Напредокот што го направивме во надминување на пандемијата ќе биде изгубен. Ќе треба да бидат развиени нови вакцини и повторно ќе бидат воведени карантини и затворања. Ќе треба да се развијат нови вакцини. Многумина кои во моментов се заштитени, особено меѓу ранливите, ќе умрат, предупредува Голдман

Објавата суптилно манипулира и за трета доза на вакцина. Кај нас, а и секаде во светот каде што се воведе трета доза на вакцина, таа само се препорачува, не е задолжителна и со ништо не е условена. Освен тоа, трета доза на вакцина е препорачана само за одредена категорија на луѓе, а не за општа популација.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар