Денеска со забавно-уметничка програма и концертни настапи на домашни и регионални изведувачи започнува „Вевчанскиот карневал“ кој ќе трае до вторник, 14ти јануари.
Забавно музичката програма покрај главното дефиле на маските, годинава ќе се одвива во две вечери. Преку маските, игрите и движењата на василичарите, на сатиричен начин се истакнуваат и исмеваат негативните појави и аномалии во општеството од изминатата година.
Вечерва во Вевчани ќе настапат мегапопуларниот македонски трапер, охриѓанецот Пајак, потоа една од најдобрите македонски поп-рок групи „Ареа“, а вечерта ќе ја затворат легендарните предводници на некогашниот сараевски „њу примитивизам“, групата „Забрањено пушење“.
Втората карневалска вечер утре, понеделник, во музичкиот програм ќе ја отвори најпознатата македонска етно-поп група „Љубојна“. По неа ќе настапи златното грло на македонската новосоздадена фолк песна Наум Петрески, а програмата ќе продолжи со „Оркестарот со зурли и тапани Вевчани“. Вечерта ќе ја затворат со својот настап Перо Бели и Коки – Биоритам.
