Во Струга на 23. Конференција на КОСАП усвоена декларација за регионално партнерство и реформи за европска интеграција

Регионалната соработка е клучен предуслов за европските интеграции, економски развој и побрз напредок на државите од Западен Балкан. Ова е една од главните пораки од 23-та Конференција на парламентарните комисии за европска интеграција и европски прашања (COSAP), која денес се одржува во Струга.

Претставници од парламентите на земјите од Југоисточна Европа, дискутираат за воспоставувањето на заеднички регионален пазар.

Посебен фокус беше ставен на германско-францускиот предлог за т.н. скалеста или фазна интеграција на земјите од регионот во Европската Унија.

„Како регион, доколку имаме добра координација и напредок, тоа ќе ни ја олесни и комуникацијата со Европската Унија, особено по најновите предлози дадени од Франција и Германија за т.н. скалеста интеграција во различни проекти и сектори. Посебно би го издвоил заедничкиот регионален и европски пазар како една целина. Доколку успееме да се интегрираме во тој единствен европски пазар, тоа ќе биде силен поттик за економските потенцијали на сите земји во регионот“, истакна потпретседателот на Собранието, Антонијо Милошоски.

Пораката од Европската Унија е дека процесот на пристапување на Западен Балкан кон ЕУ треба да се унапреди.

„Сите знаеме дека заложбите направени во 2022 година треба да се спроведат, а постои силна определба Северна Македонија да го започне пристапниот процес. Нема сомнеж дека земјата припаѓа на европското семејство. Работиме активно за да се исполнат неопходните услови и да се оди напред“, истакна амбасадорот на Европската Унија во Северна Македонија, Михалис Рокас.

„Што се однесува до предлогот на Германија и Франција, сметам дека секоја земја која спроведува реформи мора сама да го одреди најдобриот пат кон ЕУ. Интеграцијата во заедничкиот пазар е корисна и претставува сила, но тоа не е крајната цел. Крајна цел е полноправно членство и целосна интеграција во Европската Унија и на тој пат Хрватска ќе продолжи да дава силна поддршка“, истакна претседателката на Комисијата за европски прашања на Хрватскиот парламент, Јелена Милош.

На конференцијара беше усвоена заедничка декларација со заклучоци и препораки за регионално партнерство и заеднички реформи за европска интеграција.

Новинар: Соња Рилковска