Трет ден се трага по 60 годишен стружанец, кој заминал по печурки и исчезнал. Во неделата, од својата викендица во селото Брчево на падините на Караорман се упатил кон шумата, но не се вратил. Од тој ден со него не може да се воспостави телефонска комуникација, не може да се лоцира ниту мобилниот телефон.
Во потрагата е вклучена и Планинската спасителна служба на Црвениот крст и куче трагач.
„Комплициран планински терен со густа вегетација, многу тешко прооден дури и за луѓе кои пешки пристапуваат. Воздушна потрага со дронови, хеликоптери е е возможна само во мал дел од територијата, бидејки е густа шума така да пребарувањето од воздухоплов би бил без резултат“, вели Антонио Додевски од Планинската спасителна служба.
Од месната заедница од селото Брчево апелираат до сите за масовен одзив за пронаоѓање на нивниот соселанец.
„Упатуваме апел до сите ловци, планинари, велосипедисти и сите кои го познаваат теренот околу селото Брчево да се вклучат денес во потрагата по нашиот соселанец Крсте Маркоски- Кече . Секогаш сме биле тука за добро и лошо и се надеваме на масовен одзив на акцијата.“ – стои во апелот.
Ова не е прв случај на исчезнување во планина. Од ПСС велат потребни се систематски подобрувања на системот за цивилна заштита за полесна локација на исчезнати.
„Постојат современи системи кои што и онаму каде нема достапност на мобилна мрежа можат да го лоцираат мобилниот телефон но тие системи треба да се размислува да се набават. Веројатно потрагата ќе продолжи и утре.“ -додава Додески.
Повеќе од еден месец се трага и по белгискиот турист, кој исчезна на 18 септември, планинарејќи по планинските рути во регионот на Охрид, Струга, Вевчани и Битуше.
Новинар Соња Рилковска
