Се намалува бројот на хоспитализирани во струшката болница, а истовремено расте интересот за вакцинација. Во Струга имунизирани се 23 000 граѓани и уште 10 000 во Здравствениот дом во Вевчани. Од менаџментот на здравствените установи велат строго се забранети посети на ковид болни пациенти, кои се лекуваат во болниците.

Завршува препораката за онлајн настава во средните училишта во Струга. Директорите велат дека се подготвени од четврток да започнат со настава со физичко присуство. Во основните училишта во струшко, каде наставата од 1 септември се одвива со физичко присуство до денес нема ниту еден заболен ученик. Дали средношколците од Струга ќе се вратат во училипните клупи ќе зависи од одлуката на Комисијата за заразни болести.

Во струшката болница има 35 хоспитализирани пациенти, најмладиот има 42 години. Од 604 активни случаи на корона вирусот, 21 пациент се со тешка клиничка слика на кислородна поддршка. Само 12 пациенти кои се лекуваат биле вакцинирани, но сите се во стабилна состојба.

Пристапни рампи за инвалидизираните лица, бараат стружани. Тротоарите во градот се високи, а лицата со телесен инвалидитет не може слободно да се движат по тротоарите, пешачките патеки и немаат пристап до институциите, се жалат граѓаните во рубриката „Ти си твојот град” на ТВМ телевизија.

Враништани за утре најавуваат едночасовен прекин на сообраќајот на магистралниот пат Струга-Дебар. Бараат подобра комунална инфраструктура. Негодуваат дека 3 децении се запоставени комуналните потреби на жителите од сите досегашни политички структури кои биле на власт.

Струшките кајакари, ентузијасти и поддржувачи на лицата со ретки болести, под мотото „Весламе за ретките“ во сабота на 4-ти септември по втор пат ќе ги разбрануваат водите на реката Црн Дрим и Глобочичкото Езеро.

Жител на Албанија вчера беше фатен со 30 кг свежа риба кај Сатеска.

Пребрзо возење, непочитување сообраќајна сигнализација, недостаток на соодветни сообраќајни решенија, непрописно паркирање, се дел од забелешките на стружани, кои ги пријавуваат во рубриката „Ти си твојот град” на ТВМ телевизија. Граѓаните предлагаат нови сообраќајни решенија за поголема безбедност во сообраќајот, но и поригорозни казни од страна на полицијата.