Нови информативни табли и подобрено осветлување за посетителите на Вевчански Извори

Десет нови информативни табли се поставени низ заштитеното подрачје „Споменик на природата Вевчански Извори“, со цел посетителите подобро да се запознаат со природните вредности на локалитетот, но и да се поттикне одговорно однесување во природата.

Таблите содржат информации за биодиверзитетот, ретките видови и природните карактеристики на подрачјето, како и насоки за движење по патеките. Од „Еко-свест Вевчани“ посочуваат дека преку подобрата информираност се придонесува и кон заштита на живеалиштата и зачувување на чистотата на изворите.

Паралелно со овие активности, во „Вевчански Извори“ продолжува и уредувањето на инфраструктурата. Во тек е втората фаза од реконструкцијата на осветлувањето на пешачките патеки, со која се обновува и модернизира постојната опрема и се обезбедува поголема безбедност и попријатен амбиент за посетителите на овој туристички и природен локалитет.

Активностите за поставување на информативните табли се дел од проектот „Поддршка на одржливо управување со Споменикот на Природа Вевчански Извори – Фаза 2“, спроведуван од „Еко-свест“, а финансиран од Prespa Ohrid Nature Trust – PONT.