Зачестија нападите од бездомни кучиња во струшко. Изминатите десеттина денови состојбата е алармантна. Случени се повеќе напади.
Кучиња скитници направија “масакр” во село Мислешево, удавиле цело стадо овци.
Жртви на напади има и во строгиот центар на градот. Повредени од глутница кучиња се две малолетни деца и една жена.
Стружани се вознемирени и револтирани. Глутници агресивни кучиња има во сите населби во градот. Велат, стравуваат за сопственото и здравјето на своите деца.
Се чувствуваме загрозени. Како не, полна е чаршијата со кучиња, полна е не се врви по чаршија. Опасни се, трчаат по луѓе. Страшно е многу. Треба да ги спастрат негде да ги вдомат, не да ги тепаат, греота се и тие се души – вели една стружанка.
Кучиња има и во градот и во околината. Навистина претставуваат опасност. И за луѓето и за домашните животни. Нешто треба да се преземи. И во светот има тренд за заштита меѓутоа и тие организации треба да поводат сметка. И по селата имаме големи штети од кучињата скитници и врз луѓе и врз домашни животни – вели еден стружанец.
Градот сеуште нема решение за овој проблем. Има само еден волонтерски приватен стационар, кој не може да излезе на крај со стотиците кучиња во градот.
Навистина состојбата со кучињата скитници е загрижувачка. Не дека ги има во голем број, но колку и да се, ризични се за пешаците и граѓаните и дење и ноќе. Работиме во делот на собирање. Има еден приватен стационар и со нив работиме, имаме еден елаборат – вели Рамис Мерко, градоначалник на општина Струга.
Повредените од кучиња скитници во струшко најавуваат тужби до општината. Ќе бараат оштета. Не успеавме да добиеме бројка колку пари општина Струга ја чинат нанесените штети од страна на бездомните кучиња.
Новинар : Соња Рилковска
